Vertroue in die leier
Vertroue is baie belangrik vir leiers. Met hoë vertrouensvlakke kan ‘n leier makliker verandering beïnvloed en kan produktiwiteit verhoog. Daar is sewe maniere om vertroue te bou:
(a) Kry terugvoer. Vind uit hoeveel mense jou vertrou en waar daar mense is wat jou nie vertrou nie. Mense mag glo wat jy sê, maar bevraagteken jou motiewe; moontlik was daar ‘n insident wat ‘n negatiewe invloed op jou geloofwaardigheid het.
(b) Aanvaar dat jy verantwoordelik is. Vertroue is ‘n persepsie en hoe mense jou waarneem, is nie volledig onder jou beheer nie. As jou terugvoer swakplekke uitwys, is dit jou verantwoordelikheid om dit reg te stel. Regverdiging, rasionalisering en om ander te blameer, sal nie die vertroue in jou as leier verhoog nie — jou gedrag sal.
(c) Vergeet van jouself. As jy wil hê dat mense jou moet vertrou, moet jy fokus op hulle behoeftes — nie jou eie nie. Om jou besig te hou met jou agenda en jou sake, sal nie die vertroue in jou vermeerder nie.
(d) Kom jou beloftes na. As jy geneig is om beloftes te maak waaraan jy nie kan voldoen nie, sal mense se vertroue in jou afneem. Doen wat jy sê; doen dit binne die tyd waaroor ooreengekom is.
(e) Help ander spanlede. Mense besef dat ‘n leier kundigheid, hulpbronne, ‘n begroting het. Help ander om hulle doelwitte te bereik.
(f) Wees dieselfde. In woord en optrede wees altyd dieselfde — mense moet weet wat om te verwag. Hoe doen ek dit? Dit wat jy sê en doen, moet deur waardes en beginsels bepaal word. As ek hierdie waardes en beginsels met ander deel, sien hulle dat ek ‘n vaste anker in die lewe het.
(g) Vertrou ander — eerste! Hoe meer ek ander vertrou, hoe meer vertrou hulle my. As ek ander vertrou, bou ek my eie geloofwaardigheid.
Hierdie is sewe eenvoudige dinge wat jy kan doen om vertroue in jou as leier te bou. Natuurlik kan jy nog dinge byvoeg, maar hierdie is ‘n soliede begin. As ek doeltreffend wil lei, moet ek sorg dat mense my vertrou.
Ekerk Leier Nuusbrief 2009/06
Tags: bou vertroue, leier, leierskap, vertrou, vertroue
